రోజ్ కలర్ శాండిల్

ఒక్క క్షణం నా బుర్ర పని చేయలేదు.
డ్రైవింగ్ చేస్తున్న నాకు కాళ్ళ మధ్య కనబడిందా శాండిల్ (లేడీస్ కాలి చెప్పు)
నా బుర్ర మొద్దు బారింది. 
వెనక సీట్లో మా ఆవిడ ఫోన్లో ఎవరో స్నేహితురాలితో మాట్లాడుతుంది.
తన లోకం లో తాను ఉంది.
రాత్రి ఆఫీసు లో లేటయితే మా సెక్రటరీ ని తాను ఉండే యేరియాకి దగ్గర లో వదిలాను.
ఆ టైమ్ లో తనకి బస్సులు దొరకటం కష్టం .. అది ఆ రూట్లో .
ఆమె చీకట్లో దిగుతూ జారవిడుచుకుని ఉండాలి . రాత్రి ఆమెను దించి కారు రివర్స్ చేస్తుంటే ఏదో చెప్పటానికి ఆమె ప్రయత్నించింది కానీ 'థాంక్స్' చెబుతున్నదనుకున్నాను.
కానీ ఈ రోజ్ కలర్ శాండిల్.
ఇంటావిడ జరిగింది చెబితే నమ్మే అవకాశాలు చాలా తక్కువ.
ఆ దీర్గపు మాటలు, అనుమానపు చూపులు.. విసుర్లు .. మౌనాలు .
అబ్బో ఆ నరకం భరాయించేది కాదు.
వత్తిడితో నేను కార్లో ఏ‌సి ని పెంచాను.
అద్దం లోంచి వెనక్కి చూశాను. పెద్దగా నవ్వుతూ మాట్లాడుతోంది.
తను కొన్న హారాన్ని స్నేహితురాలు ఫోన్ లోనే పొగడుతున్నట్లు ఉంది.
ఈమె లోకం మరిచి పోయింది. 'పొగడ్త' అది అని తెలిసినా వీళ్ళు దానికి బానిసలు.
పంజాగుట్ట ఫ్లై ఓవర్ బ్రిడ్జి వద్ద సిగ్నల్ పాయింటు వద్ద కారు ఆగింది.
అద్దం దించి అడుక్కునే అతనికి డబ్బు ఇస్తూ.. అత్యంత చాకచక్యంగా శాండిల్ బయట వేశాను.
హ మ్మ య్య ..
****
ఇంటికి వచ్చి సెల్లార్ లో కారు పార్క్ చేశాను.
ఎంతకీ దిగదే ఈవిడ ..
"ఏమిటి .. ఏమయింది ?"
"నా రోజ్ కలర్ శాండిల్ ఒకటే ఉంది. రెండోది కనిపించడం లేదు. నిన్ననే యెగ్జిబిషన్ లో కొన్నాను."
కార్లో లైట్ వేసి ఆమె వెతక సాగింది.